Fyrrverandi ráðherra vill kalla sendiherra í Bandaríkjunum heim

Eiður Guðnason, fyrrverandi sendiherra og ráðherra, vill að sendiherra Íslands í Bandaríkjunum verði kallaður heim. Hann gagnrýnir á bloggi sínu að enn hafi ekki verið skipaður bandarískur sendiherra hér, og vill að íslenski sendiherrann vestra verði kallaður heim til skrafs og ráðagerða sem fyrst.

Tilefnið eru fréttir af leyniskýrslum um íslenska ráðamenn. Össur Skarphéðinsson, utanríkisráðherra, segir óþolandi og óviðeigandi að vinaríki geri leyniskýrslur um íslenska stjórnmálamenn, en þær voru birtar að undirlagi Wikileaks í DV og Ríkisútvarpinu. Þar var greint frá upplýsingum um Össur sjálfan, Jóhönnu Sigurðardóttur, forsætisráðherra og Albert Jónsson, aðalræðismann í Færeyjum, sem var áður sendiherra í Bandaríkjunum.

Í Wikileaks-skjölunum segir að Albert Jónsson, sem þá var sendiherra í Washington, hafi mótmælt því sem hann hafi talið ófullnægjandi útskýringar Bandaríkjamanna á fangaflugi CIA í íslenskri landhelgi. Samt hafi hann unnið að því með bandarískum diplómötum að gera lítið úr fangafluginu opinberlega.