Flestir vilja frekar innlent efni í sjónvarpi

Tæp 43 prósent sækjast mun eða heldur meira eftir innlendu efni en erlendu í sjónvarpi. Þetta kemur fram í nýrri könnun Félagsvísindastofnunar Íslands um menningarneyslu á Íslandi.

Um 40 prósent þátttakenda sækjast jafn mikið eftir innlendu og erlendu efni og rúm sautján prósent sækjast frekar eftir erlendu efni en innlendu.

Athygli vekur að lægst er hlutfall þeirra sem kjósa fremur innlent efni en erlent í hópi háskólamenntaðra, eða 35 prósent. Í öðrum innlendum menningarviðburðum er hlutfallsleg aðsókn einna mest í hópi þeirra sem lokið hafa háskólaprófi.

Í sömu könnun kemur fram að um 76 prósent svarenda fóru í bíó einhvern tímann á tólf mánaða tímabili frá og með haustinu 2008. Tæplega helmingur þeirra, um 46 prósent, sá íslenska mynd.

Hlutfallslega fleiri konur en karlar sáu íslenska mynd á þessu tímabili, 51 prósent á móti 40. Þá má sjá að aðsókn á íslenskar myndir er meiri í eldri aldurshópum; mest var hún í hópi bíógesta á sextugsaldri, 58 prósent, en minnst hjá aldurshópnum 30 til 39 ára, 35 prósent. - bs