Almennir notendur bera gjaldskrárhækkun OR einir

Framkvæmdastjóri Neytendasamtakanna gagnrýnir að almennir notendur beri gjaldskrárhækkun Orkuveitu Reykjavíkur einir, erfiðleikar Orkuveitunnar stafi ekki af þjónustu við þá. Orkuveitan hækkaði gjaldskrá sína um allt að 40% í gær.

Tekin var ákvörðun um hækkunina á stjórnarfundi Orkuveitunnar í gær, en Orkuveitan hefði að óbreyttu ekki getað staðið undir endurgreiðslu lána. Rafmagnsverð hækkar um 11 prósent, verð á heitu vatni um 30 prósent og gjald fyrir dreifingu rafmagns um heil 40 prósent. Hækkunin tekur gildi 1. október.

Fyrir venjulega fjögurra manna fjölskyldu í fjölbýli er algengt að rafmagnsreikningur sé nú um 8.800 krónur á mánuði. Miðað við gjaldskrárhækkunina mun reikningur fjölskyldunnar nú hækka um 2.400 krónur, eða tæp 30 prósent. Í skýringum sem Orkuveita Reykjavíkur hefur látið fjölmiðlum í té er talið að heimilisútgjöld viðskiptavina Orkuveitunnar muni að jafnaði hækka um 0,7 prósent, en að teknu tilliti til markaðshlutdeildar fyrirtækisins munu verðbólguáhrifin vegna þessa vera um 0,4 prósent með tilheyrandi hækkun verðtryggðra lána.

Auk gjaldskrárhækkunarinnar mun Orkuveitan bregðast við skuldavanda sínum með eignasölu og frekari hagræðingu í rekstri, en meðal annars verður efsta hæð Orkuveituhússins rýmd og hún leigð út.

Fulltrúar Vinstri grænna og Sjálfstæðisflokks í stjórn Orkuveitunnar gagnrýna þessa hækkun. Sjálfstæðismenn segja frekari hagræðingu mögulega og að hækkunin hefði átt að koma fram í áföngum. Vinstri grænir vilja endurskoða raforkusamninga við stóriðju með það að markmiði að auka tekjur Orkuveitunnar.

Þuríður Hjartardóttir, framkvæmdastjóri Neytendasamtakanna, tekur undir það sjónarmið og segir hækkunina sláandi.