Ólíklegt að ein ræða geti sefað reiði almennings

Mjög ólíklegt er að einhver ein ræða, sama hversu góð hún er, geti sefað þá reiði sem virðist komin í almenning, segir Gunnar Helgi Kristinsson, prófessor í stjórnmálafræði við Háskóla Íslands, um stefnuræðu Jóhönnu Sigurðardóttur forsætisráðherra í kvöld. Hann segir ræðu Jóhönnu hafa verið mjög dæmigerða miðað við hvernig stefnuræður forsætisráðherra hafa verið hingað til.

„Það sem hún er að reyna að gera er tilraun til að horfa frammá veginn til að segja að það sé eitthvað í gangi, en hvort að það slær eitthvað á ólguna finnst mér vafamál," segir Gunnar Helgi. Hann segir mjög sjaldgæft að einhver ein ræða eða einn atburður breyti rás atburða.

Gunnar Helgi segir að margt sé líkt með atburðarrásinni núna og í byrjun árs 2009 í aðdragandann að stjórnarslitum Sjálfstæðisflokksins og Samfylkingarinnar. Hins vegar sé líka margt ólíkt. Í byrjun árs 2009 hafi afstaða Samfylkingarinnar til ríkisstjórnarinnar klofnað eftir vísbendingar um að fylgið væri að hrynja af Samfylkingunni. Engar vísbendingar væru um að fylgið væri að hrynja af VG núna og þess vegna væri ólíklegt að flokkurinn myndi vilja slíta ríkisstjórnarsamstarfinu.