Unnið að breytingum á reglum um greiðsluaðlögun og nauðungarsölur

Unnið er að breytingum á lögum um greiðsluaðlögun og nauðungarsölu fasteigna. Frumvörp koma fram fljótlega, kannski í næstu viku, sagði Jóhanna Sigurðardóttir, forsætisráðherra, á Alþingi í gær.

Þorgerður Katrín Gunnarsdóttir, varaformaður Sjálfstæðisflokksins, spurði Jóhönnu álits á upplýsingum um að 83 prósent þeirra, sem leitað hafa fyrirgreiðslu í bönkum við endurskipulagningu skulda, telji sig ekki hafa fengið fullnægjandi úrlausn sinna mála. Gylfi Arnbjörnsson, forseti ASÍ, hefur sagt þær tölur áfellisdóm yfir stjórnvöldum.

Jóhanna sagði að verið væri að vinna að ýmsum úrræðum fyrir fólk í skuldavanda í dómsmálaráðuneyti og félags- og tryggingaráðuneyti. Brýnt sé til dæmis að taka á málum þeirra sem eiga eignir á nauðungarsölum. Eins hafi verið gerðar athugasemdir við framkvæmd greiðsluaðlögunar. Verið sé að vinna að endurbótum sem taka mið af þeim athugasemdum. „Ég vona að við sjáum endurbætt frumvörp fljótlega, sagði Jóhanna. - pg