Hurðum og gluggum stolið í tugatali

Hátt í fimmtíu útidyrahurðum og gluggum er talið hafa verið stolið úr sex tveggja hæða íbúðum af níu í raðhúsalengju sem Byggingarfélagið Kjölur hefur verið að reisa með hléum við Elliðavað í Norðlingaholti síðastliðin þrjú ár.

Halldór Halldórsson, framkvæmdastjóri Kjalar, segir starfsmenn hafa tekið eftir stuldinum þegar þeir komu til starfa eftir vikufrí á mánudag.

Hann segir nokkra hljóta að hafa verið að verki, þeir verið vel tækjum búnir og með flutningabíl til að koma farminum á brott. Stærstu gluggarnir eru um tvö til þrjú hundruð kíló á þyngd, en þeir eru sérpantaðir rammar með umgjörð og gleri í og pantaðir eftir máli frá Danmörku. Fjóra menn þurfti til að koma stærstu gluggunum fyrir og skrúfa þá í veggi húsanna, að sögn Halldórs. Gluggar og hurðir í húsin öll voru keypt í fyrra og kostuðu þrettán milljónir króna.

Byggingarfélagið Kjölur var með framkvæmdalán frá Landsbankanum og Frjálsa fjárfestingarbankanum upp á 494 milljónir króna í lok árs 2007, þar af þriðjung í erlendri mynt. Halldór segir hafa verið samið við kröfuhafa um að koma húsunum í söluhæft ástand.

Árni Þór Sigfússon, aðstoðaryfirlögregluþjónn á lögreglustöð 4, segir málið í rannsókn. Skoða þurfi marga þætti. Meðal annars hvort nágrannar hafi tekið eftir mannaferðum við húsin. - jab