Stórflutningaskip strandaði við Borgundarhólm í nótt

Stórflutningaskip af stærri gerðinni strandaði við Borgundarhólm í nótt. Situr skipið nú fast um 800 metra frá landi við Sorthat.

Um er að ræða 167 metra langt, tæplega 17.000 tonna fulllestað skip sem skráð er á Möltu en það ber heitið Odin Pacific.

Samkvæmt frétt um málið í Jyllands Posten mun stýrimaður skipsins hafa verið einn á vakt í brúnni þegar skipið strandaði en hann er grunaður um að hafa verið ölvaður.

Björgunarskip frá dönsku standgæslunni eru komin á staðinn og reyna á að ná Odin Pacific á flot á flóðinu seinna í dag.