Auðveldara að meta börn eftir átta ára aldur

Tryggingafélagið Sjóvá metur hvort hægt sé að tryggja börn með þroskaröskun, eins og ofvirkni með athyglisbrest, eftir að barnið hefur náð átta ára aldri, samkvæmt vinnureglum fyrirtækisins. Þetta segir Valborg Sveinsdóttir, sérfræðingur í persónutryggingum hjá Sjóvá. Hún segir að ástæðan sé sú að eftir þann aldur sé auðveldara að meta barnið.

„Þá er barnið búið að vera í skóla í ákveðinn tíma og komin ákveðin reynsla á það hvernig það fúnkerar í umhverfinu með sinni fötlun eða þroskaröskun. Og þá er kannski hægt að sjá betur til hvort það er aukin áhætta varðandi slys eða annað," segir Valborg. Hún segir að eftir þennan aldur sé vel hugsanlegt að hægt sé að veita trygginguna með einhverjum takmörkunum.

Vísir sagði í morgun frá máli Sunnu Albertsdóttur. Hún fær ekki að tryggja sjö ára gamlan son sinn sem er greindur með ofvirkni og athyglisbrest. Hún gagnrýnir Sjóvá og segir tryggingarskilmálana afar undarlega. Valborg viðurkennir vissulega að tryggingin sé takmörkuð. Það sé vegna þess að hún sé ódýr. Iðgjaldið er um 11 þúsund krónur á ári. Valborg segir að þegar verið sé að meta svona tryggingar sé tekið tillit til heilsufarsupplýsinga. „Hvers kyns atriði í heilsufarssögunni eru skoðuð," segir Valborg. Bætur séu greiddar fyrir slys sem barn verður fyrir eða sjúkdóma sem barnið fær á tryggingatímanum eftir að tryggingin hefur verið tekin. „Það að heilbrigt barn sé komið með tryggingu og greinist síðan með einhvern sjúkdóm. Það er akkúrat það sem tryggingin gengur út á," segir Valborg.

Valborg segir að í sumum tilfellum þurfi að meta það eftir ákveðinn aldur hvort hægt sé að veita trygginguna og þá með ákveðnum takmörkunum. Þannig hafi það verið í tilviki Sunnu og drengsins hennar. Hún segir dæmin vera hliðstæð ef um aðra sjúkdóma er að ræða. „Ef það kæmi umsókn fyrir barn sem þegar er komið með sykursýki, þá þyrftum við að bregðast við því á sama hátt og við myndum bregðast við umsókn frá barni sem er þegar komið með einhverja þroskaröskun," segir Valborg.