Varðskipið minna laskað en óttast var í fyrstu

Talið er að nýja varðskipið Þór sé minna laskað en óttast var í fyrstu eftir flóðbylgjuna sem kom í kjölfar jarðskjálftanna í Chile nýverið. Það verður sjósett aftur á morgun og allsherjarúttekt verður gerð á því í næstu viku.

Starfsmönnum skipasmíðastöðvarinnar hefur tekist að lagfæra þurrkvína, sem skipið er í, þannig að sjósetning er möguleg. Því næst verður kvíin hreinsuð og skipið tekið aftur upp til allsherjar úttektar flokkunarfélaga, tryggingafélaga og framleiðenda sem væntanlegir eru til Chile í næstu viku ásamt fulltrúum Gæslunnar sem halda utan á morgun. Talið er að ýmsir rafmótorar og ljósvélar skipsins hafi eyðilagst þegar sjór komst í vélarrúmið, en hinsvegar lítur út fyrir að stýribúnaður, öxlar, aðalvél og megnið af rafkerfinu séu óskemmd.

Að sögn Georgs Lárussonar, forstjóra Landhelgisgæslunnar telja starfsmenn skipasmíðastöðvarinnar að ef þetta verði niðurstaðan af úttektinni verði hægt að afhenda skipið fullbúið í júní.