Íslenskur sérfræðingur: Rússanna bíður erfitt verk

Rannsóknarnefnd flugslysa í Rússlandi bíður erfitt og viðkvæmt verkefni segir íslenskur flugslysasérfræðingur. Vladimir Pútin ætlar persónulega að fylgjast með rannsókninni.

Pútin sagði í dag nauðsynlegt að tryggja að allt verði gert til þess að komast að því hvað olli flugslysinu í gærmorgun, á sem stystum tíma. Flugritar Tupalov vélarinnar sem fórst með Kacynski og föruneyti hafa þegar fundist og rannsakendur eru þegar byrjaðir að greina hann.

Starfsmaður Rannsóknarnefndar flugslysa hér á landi segir að nokkrar vikur séu þar til skýr svör fáist um orsakir slyssins.

„Síðan verða flugupptökur og samsamskipti við flugturna yfirfarið. Síðan eru viðtöl við vitni og þá sem geta gefið upplýsingar um slysið. Síðast en ekki síst er það vettvangurinn sjálfur en það tekur væntanlega einhverja daga eða vikur að skoða ummerki," segir Þorkell Ágústsson, forstöðumaður og rannsóknarstjóri Rannsóknarnefndar flugslysa.

Frumniðurstöður gætu þó legið fyrir innan skamms. Ljóst sé þó að rannasakendur eru undir mikilli pressu enda er flugslysið í gær nánast án fordæma.

„Maður á mjög erfitt með að ímynda sér að svona nokkuð hafi gerst á friðartímum. Að æðstu embættismenn ríkis farist allir í slysi af þessu tagi," segir Guðni Th. Jóhannesson, sagnfræðingur.

Eins og fram hefur komið var forsetinn á leiðinni til minningarathafnir í Katyn skógi þar sem meira en 20 þúsund pólskir liðsforingjar voru teknir af lífi að skipan Jósef Stalín.

„Pólska þjóðin hefur síðustu aldir þurft að þola ótrúlegar hörmungar. Saga okkar er dans á rósum miðað við það. Það að þetta stórslys verði í þessu samhengi setur auðvitað mjög sérstakan svip á þetta," segir Guðni.