Sigrún Elsa: „Þetta er bara kjaftæði og ekki boðlegt“

„Við spurðum um þetta í janúar og ítrekað í borgarráði" segir Sigrún Elsa Smáradóttir, fulltrúi Samfylkingarinnar í stjórn Orkuveitunnar, um yfirvofandi gjaldskrárhækkun Orkuveitunnar á heitu vatni. Fréttablaðið greindi frá því í dag að það standi til að hækka verð á heitu vatni um 37 prósent á næstu fimm árum.

Sigrún Elsa segir að fulltrúar Samfylkingarinnar hafa fyrst spurt um hugsanlega hækkun í janúar, eða fyrir fjórum mánuðum síðan. Tilefnið var í tengslum við samþykkt á nýrri stefnumótun og eigendastefnu Orkuveitunnar. Hún segir að svör hafi ekki borist við fyrirspurnunum fyrr en nú en hún telur Hönnu Birnu Kristjánsdóttur, fráfarandi borgarstjóra, ábyrga fyrir því að engin svör hafi fengist.

Á minnisblaði sem Sigrún Elsa hefur undir höndum kemur fram að útreikningarnir hafi verið tilbúnir mánudaginn eftir kosningar.

„Það er ekki hægt að segja mér að það hafi tekið fjóra mánuði að vinna þetta og ef það er raunin er það líka merki um algjört viljaleysi," segir Sigrún Elsa sem útskýrir að ekki sé um flókna útreikninga að ræða. Stjórnarformaður Orkuveitunnar, Guðlaugur Sverrisson, sagði í Fréttablaðinu í dag að það hefði einfaldlega ekki tekist að vinna málið hraðar.

Sigrún Elsa segir að upplýsingunum hafi beinlínis verið haldið frá kjósendum til þess að ekki væri varpað ljósi á erfiða fjárhagsstöðu Orkuveitunnar fyrir kosningar, en gjaldskrárhækkunin er tilkomin til þess mæta erfiðleikum í rekstri fyrirtækisins.

„Þetta er bara kjaftæði og ekki boðlegt," segir Sigrún Elsa sem er harðorð enda fjórir mánuðir síðan fyrsta fyrirspurnin lá fyrir í borgarráði.