Lokað inn í Þórsmörk fram yfir helgi

Almannavarnanefnd Rangárvallasýslu og Vestur-Skaftafellsýslu, almannavarnadeild ríkislögreglustjóra og vísindamenn komu saman í dag.

Í ljósi stöðunnar var ákveðið að vegurinn inn í Þórsmörk verði áfram lokaður almennri umferð, að minnsta kosti fram yfir helgi. Vakin er sérstök athygli á því að þetta á einnig við um leiðina yfir Markarfljót enda þurfa menn að fara leið sem er lokuð umferð vegna aurbleytu, segir í tilkynningu frá almannavarnadeild Ríkislögreglustjóra. „Bent hefur verið á að þó að fólk vilji leggja ýmislegt á sig til að sjá landið mótast er óþarfi að skemma það land sem við eigum í dag."

Ekki er lengur mælst til þess að eigendur sumarhúsa dvelji ekki þar yfir nótt en þeir eru áfram hvattir til að fylgjast með tilkynningum frá yfirvöldum.

„Enn er ástæða til að biðja fólk að fara varlega við gosstöðina og í grennd hennar. Gufusprengingar geta fyrirvaralaust orðið þar sem hraunið fer um og mætir vatni eða snjó. Litlu mátti muna að slys yrði í dag þegar gufusprenging í Hvannárgljúfri þeytti 2-3 kg hnullungum upp á brúnina þar sem fólk var. Myndarlegt sveppalaga ský fylgdi í kjölfarið og steig það hátt til himins," segir í tilkynningunni.

Þá er fólk sem hyggst fara austur til að skoða eldgosið hvatt til þess að kynna sér vel veðurspá áður en lagt er af stað.