Leiðréttingaleið bankanna órökrétt

Fólk með yfirveðsett heimili sem þiggur 110% leiðréttingarleið bankanna gæti þurft að greiða hundruð þúsunda króna á mánuði í skatta af niðurfellingunni verði hugmyndir stjórnvalda um skattlagningu afskrifta að veruleika. Órökrétt að hjálpa fólki fyrst upp á núllið, til að skatturinn keyri það svo aftur niður fyrir núllið segir Pétur Blöndal þingmaður sjálfstæðismanna.

Í Viðskiptablaðinu í gær birtist grein eftir Ástu Dís Óladóttur, forseta viðskiptadeildar Háskólans á Bifröst. Ásta Dís tekur dæmi og það hljómar svona: Einstaklingur fékk lán fyrir 80% af verði fasteignar, tæpar 39 milljónir króna. Uppreiknað stendur lánið í tæpum 85 milljónum króna. Leiðréttingin, miðað við 110% leið bankanna, myndi þá hljóða upp á 43 milljónir. Samkvæmt útreikningum Ástu Dísar sem byggðir eru á frumvarpsdrögum frá fjármálaráðuneytinu þarf þessi einstaklingur að greiða samtals rúma þrettán og hálfa milljón í skatt af niðurfellingunni. Það þýðir að manneskja sem ræður ekki við skuldir sínar, þyrfti þá að greiða skattinum 378 þúsund krónur á mánuði í þrjú ár, auk þess að greiða af láninu sjálfu.

Margir hafa gagnrýnt þessa leið, m.a. Hagsmunasamtök heimilanna, Talsmaður neytenda og hagfræðiprófessorar. Pétur Blöndal, þingmaður í efnahags- og skattanefnd, tekur í sama streng.

„Ég held að þingmenn sjái strax hvað þetta er órökrétt að hjálpa fyrst fólki upp að núllinu og síðan kemur skatturinn og keyri það aftur niður. Það er engin lausn þannig að ríkið þarf að taka þátt í þessu," segir Pétur.

Pétur bendir á að hingað til hafi hækkun og lækkun á húsnæðisverði ekki verið talin til tekna eða gjalda hjá skattinum. Heldur ekki hækkun og lækkun á skuldum vegna verðbóta.