Aukinnar bjartsýni gætir eftir fundinn með Strauss Kahn

Ríkisstjórnin bindur vonir við að önnur endurskoðun Alþjóðagjaldeyrissjóðsins á efnahagsáætlun Íslands geti farið fram í næsta mánuði án þess að lausn liggi fyrir í Icesave málinu. Aukinnar bjartsýni gætir eftir fund ráðherra með framkvæmdastjóra sjóðsins í dag

Steingrímur J. Sigfússon, fjármálaráðherra og Gylfi Magnússon, efnahags- og viðskiptaráðherra, funduðu með Dominique Strauss Kahn, framkvæmdastjóra Alþjóðagjaldeyrissjóðsins í Washington í dag.

Önnur endurskoðun sjóðsins á efnahagsáætlun Íslands hefur nú tafist í tæpa tvo mánuði en stjórn sjóðsins hefur ekki viljað setja málið á dagskrá fyrr niðurstaða liggur fyrir í Icesave. Þessari tengingu hafa íslensk stjórnvöld mótmælt og nú síðast forsætisráðherra í bréfi til framkvæmdastjóra sjóðsins.

Samkvæmt upplýsingum frá efnahags- og viðskiptaráðuneytinu gætir aukinnar bjartsýni eftir fundinn í dag. Nú þykir líklegt að endurskoðun sjóðsins geti farið fram í næsta mánuði án þess að fyrir liggi niðurstaða í Icesave.