Veikleiki listans er skortur á endurnýjun

Niðurstaða prófkjörs Sjálfstæðisflokksins í Reykjavík skilar lista sem lítur ágætlega út, með óumdeildan leiðtoga. Veikleiki listans er helst skortur á endurnýjun, segir Gunnar Helgi Kristinsson, prófessor í stjórnmálafræði við Háskóla Íslands.

Hanna Birna Kristjánsdóttir borgarstjóri hlaut afgerandi kosningu í fyrsta sætið, sem sýnir öðru fremur að hún er fremur óumdeildur leiðtogi flokksins í borginni, segir Gunnar Helgi.

Í öðru sæti hafnaði Júlíus Vífill Ingvarsson, einn þeirra fimm sem sóttist eftir því sæti á listanum. Gunnar Helgi segir niðurstöðuna í slagnum um annað sætið ekki koma sérstaklega á óvart. Júlíus Vífill komi vel út, og fyrirfram hafi verið vitað að staða Gísla Marteins Baldurssonar, sem hafnaði í fimmta sætinu, væri erfið.

Niðurstaðan er ákveðinn varnar­sigur fyrir Gísla Martein, þrátt fyrir að rætt hafi verið um að hann hafi verið framtíðar forystuefni flokksins í borginni fyrir nokkrum árum.

Það hljóta að vera vonbrigði fyrir Geir Sveinsson að hafna í sjötta sætinu, segir Gunnar Helgi, en hann var einn þeirra sem sóttust eftir öðru sætinu. Þetta sýni að það sé ekki sjálfrötuð leið í forystusæti í stjórnmálum

Það hljóta að vera vonbrigði fyrir Jórunni Frímannsdóttur að hafna í áttunda sætinu á listanum eftir að hafa sóst eftir því þriðja, segir Gunnar Helgi. Ýmislegt geti hafa haft áhrif á hennar gengi, til dæmis umdeilt sjónvarpsviðtal í Ríkissjónvarpinu nýverið.

Þátttaka í prófkjörinu var fremur dræm, tæplega 35 prósent. Gunnar Helgi segir það líklega tengjast því að ekki hafi verið slagur um fyrsta sætið, en Hanna Birna var sú eina sem bauð sig fram til forystu á listanum. - bj