Hafa fundið 185 beinagrindur

Beinagrind af manneskju með Pagets-sjúkdóminn fannst við fornleifauppgröft á Skriðuklaustri í Fljótsdal í vikunni. Steinunn Kristjánsdóttir, fornleifafræðingur og ábyrgðarmaður verkefnisins, segir margt merkilegt hafa komið í ljós við uppgröftinn, en þetta er níunda sumarið sem unnið er við hann.

„Við vitum núna að í klaustrinu var starfræktur spítali frá árunum 1490 til 1550 og þetta er sá elsti sem hefur fundist hér á landi,“ segir hún. „Það var ekki vitað að klaustrin hefðu stundað slíka starfsemi fyrr en við byrjuðum að finna beinagrindir sjúklinga árið 2003.“

Búið er að grafa upp 185 beinagrindur til þessa, en þetta er í fyrsta sinn sem manneskja með Pagets-sjúkdóminn hefur fundist, og segir Steinunn að einungis eitt tilvik hafi áður fundist hér á landi.

„Við höfum fundið mörg tilfelli af sárasótt og berklum, en þetta tilvik var ólíkt þar sem sjúkdómurinn veldur ofvexti og afmyndun í beinum,“ segir hún. Rekstrartími klaustursins og spítalans var í kring um sextíu ár og segir Steinunn þann mikla fjölda sem þar hefur dvalið gefa til kynna að fólk hafi leitað þar hælis víðsvegar að af landinu og jafnvel erlendis frá.

- sv