Ja.is besti íslenski vefurinn

Ja.is var valinn besti íslenski vefurinn á Íslensku vefverðlaunum sem Samtök vefiðnaðarins stóðu fyrir í dag. Katrín Júlísdóttir, Iðnaðarráðherra afhenti verðlaunin við athöfn sem haldin var í Hugmyndahúsi háskólanna og voru veittar viðurkenningar fyrir framúrskarandi vefi í 10 flokkum. Í tilkynningu frá samtökunum segir að alls hafi borist yfir 100 tilnefningar til verðlaunanna að þessu sinni, en þetta er í níunda skipti sem Íslensku Vefverðlaunin eru haldin.

Í umsögn dómnefndar um vef ja.is kom fram að „vefurinn þjóni hlutverki sínu vel, sé stílhreinn, einfaldur og vel skipulagður. Leitarvélin skilur íslensku í öllum beygingarmyndum, niðurstöður eru skilvirkar og mjög auðvelt er að gera greinarmun á því hvort leitað er að fólki eða fyrirtækjum. Kortaleit er til fyrirmyndar og má segja að vefurinn sé byltingarkenndur í aðgengi upplýsinga um íslenska staðhætti."

Aðrir vefir sem fengu viðurkenningu við sama tækifæri voru:

Besta viðmót og hönnun - nikitaclothing.com

Frumlegasti - hugmyndaraduneytid.is

Besti sölu- og kynningarvefurinn (yfir 50 starfsmenn) - play.eveonline.com

Besti sölu- og kynningarvefurinn (undir 50 starfsmenn) - nikitaclothing.com

Besti þjónustu- og upplýsingavefurinn - ja.is

Besti afþreyingar- og fréttavefurinn - skjarinn.is

Besta markaðsherferðin - Landsbankinn/Náman

Besta blog/efnistök/myndefni - gummisig.com

Besti hand-smátækja vefurinn - m.ja.is

Íslensku vefverðlaunin eru uppskeruhátíð vefiðnaðarins, haldin með það að markmiði að efla hann, verðlauna bestu vefina og hvetja þá sem starfa á þessum vettvangi til dáða.