Þrotabú Baugs vill „miskabætur“ til baka vegna fjársvikamáls

Þrotabú Baugs hefur höfðað riftunarmál gegn lögfræðingnum Karli Georg Sigurbjörnssyni vegna starfa hans fyrir A Holding, dótturfélag Baugs. Fyrirtaka fór fram í málinu í Héraðsdómi Reykjavíkur í morgun.

Samkvæmt heimildum Vísis fékk Karl Georg um tíu milljónir greiddar í nokkurskonar miskabætur eftir að hann var ákærður fyrir fjársvik á síðasta ári en því var haldið fram að hefði blekkt Sigurð Þórðarson, fyrrverandi ríkisendurskoðanda til að selja stofnfjárbréf í Sparisjóði Hafnarfjarðar á 25 milljónir hvert í stað 45 milljóna. Karl Georg var svo sýknaður í Héraðsdómi Reykjavíkur.

Samkvæmt heimildum Vísis er litið á greiðsluna sem gjafagjörning af hálfu þrotabús Baugs og farið fram á riftun þess vegna. Rökin eru helst þau að Baugur hafi ekki haft neina skyldu til þess að greiða Karli Georg þessa upphæð. Sjálfur á Karl Georg að hafa farið fram á þennan pening sem miskabætur fyrir þær hremmingar sem hann taldi sig hafa lent í vegna stofnfjárkaupanna.

Dómsmálið vakti gríðarlega athygli en það fór fram í febrúar á síðasta ári. Meðal þeirra sem báru vitni voru athafnamennirnir Pálmi Haraldsson og Magnús Ármann.

Þeir sögðust báðir hafa litið á kaup sín á stofnfjárhlutum í Sparisjóði Hafnarfjarðar sem gott viðskiptatækifæri enda hafi sameining sjóðsins við aðra sparisjóði legið fyrir. Pálmi sagðist ekki hafa vitað af því að hann væri að kaupa bréfin af A Holding.

Það voru Karl Georg ásamt Sigurði G. Guðjónssyni sem höfðu milligöngu um að kaupa stofnfjárhluti í Sparisjóði Hafnarfjarðar árið 2006 fyrir A Holding, dótturfélag Baugs. Félagið var staðsett í Lúxemborg og fóru kaupin í gegnum útibú þess í Sviss.

Málinu var svo áfrýjað til Hæstaréttar í mars á síðasta ári.