Leitarleyfi á Drekasvæðinu laus til umsóknar

Drekaútboðið hófst í janúar í fyrra og var fyrsta olíuleitarútboð Íslendinga. Fimm leyfi voru boðin út. Þegar umsóknarfrestur rann út í maí kom í ljós að tvær umsóknir höfðu borist en svo fór að þær voru báðar dregnar til baka. Samkvæmt skilmálum útboðsins er heimilt að hafa þau leitarleyfi sem ekki gengu út áfram til ráðstöfunar.

Katrín Júlíusdóttir iðnaðarráðherra segir að það sú nú opið fyrir þá sem vilji sækja um að koma umsóknum til Orkustofnunar. Þær verði síðan metnar faglega. Síðan sé ætlunin að fara aftur í útboð á næsta ári.

Í millitíðinni hefur það gerst að norski olíumálaráðherrann fór í táknræna heimsókn til Jan Mayen síðastliðið haust til að marka fyrsta skref í olíuleit Noregsmegin á hryggnum.

Í ljósi þess að íslenska olíuskattalöggjöfin var gefin upp sem ein helsta ástæða þess að umsækjendur drógu sig til baka má spyrja hvort til nokkurs sé að halda áfram nema breyta sköttunum. Iðnaðarráðherra segir að það verði skoðað með hliðsjón af því hvernig Norðmenn ætla að skattleggja svæðið sín megin. Það sé engum dyrum lokað í því.

"Við ætlum að vera samkeppnishæf. En við ætlum engu að síður að verðleggja okkar auðlindir hátt," segir Katrín.