Hjónabönd samkynhneigðra ekki mannréttindi

Það voru tveir Austurríkismenn sem fóru með mál sitt fyrir mannréttindadómstólinn eftir að þeim var synjað um að ganga í hjónaband á þeim forsendum að það gilti aðeins fyrir samband manns og konu.

Lögmenn Austurríkismannanna töldu það brjóta í bága við 12. grein Mannréttindasáttmála Evrópu þar sem stendur að allir karlar og konur eigi rétt á að ganga í hjónaband.

Dómstóllinn sagði hinsvegar að ekki væri hægt að túlka þessa málsgrein þannig að allir karlar og konur eigi rétt á hjónabandi án tillits til þess hvers kyns makinn sé.

Dómstóllinn komst þvert á móti að þeirri niðurstöðu að löndum sé ekki skylt að leyfa hjónabönd samkynhneigðra. Þeim sé ekki einusinni skylt að leyfa staðfesta sambúð.

Hjónabönd samkynhneigðra teljist ekki til almennra gilda í Evrópu og því geti hvert land fyrir sig ákveðið hvernig það tekur á þessum málum.

Með breytingum á hjónabandslögum sem tóku gildi hér um síðustu helgi er Ísland eitt af níu löndum í heiminum sem leyfir samkynhneigðum að ganga í hjónaband.