Nemendur HÍ bestir á lögmannsprófum

Lögfræðingar frá lagadeild Háskóla Íslands skara fram úr lögfræðingum frá öðrum lagadeildum í prófum til að öðlast réttindi sem héraðsdómslögmaður.

Að beiðni Bjargar Thorarensen, deildarforseta í lagadeild Háskóla Íslands, tók nefnd, sem annast umsjón með prófum til að öðlast málaflutningsréttindi fyrir héraðsdómstólum, saman upplýsingar um árangur þeirra sem tóku prófin árin 2005 til 2009.

„Þetta staðfestir það sem við höfum sagt; að bæði fræðileg undirstaða og þjálfun sem veitt er hér í lagadeild Háskóla Íslands veiti bestan undirbúning til að að standast kröfur lögmannsprófsins og starfa sem lögmenn,“ segir Björg um niðurstöðurnar.

Úr töflu sem prófnefndin tók saman má lesa árangur eftir því úr hvaða lagadeildum próftakarnir komu. Kemur þá í ljós að af 193 sem komu úr Háskóla Íslands náðu 137 eða 71,0 prósent prófunum í fyrstu tilraun. Af 45 lögfræðingum frá Háskólanum í Reykjavík náðu sextán, eða 26,3 prósent, prófunum í fyrstu tilraun. Frá Bifröst náðu fimm af nítján prófunum í fyrstu tilraun. Það svarar til 26,3 prósenta. Frá Háskólanum á Akureyri náði enginn af aðeins fjórum sem sátu námskeiðin prófunum í fyrstu atrennu.

Bryndís Hlöðversdóttir, deildarforseti lagadeildar á Bifröst, segir fjölda einstaklinga þaðan í gögnum prófnefndarinnar svo lítinn að samburður sé ómarktækur. „Þetta eru of fáir einstaklingar til að hægt sé að draga ályktanir um námið hjá okkur sem slíkt. Ef samanburðurinn hefði verið árið 2006 þá hefði Bifröst verið í toppsætinu,“ segir Bryndís og vísar til þess að árið 2006 náðu báðir lögfræðingarnir frá Bifröst sem þreyttu prófin að standast þau og árangurinn þar með 100 prósent.

Þórður S. Gunnarsson, deildarforseti lagadeildar Háskólans í Reykjavík, hafnar því algjörlega að gæði námsins þar séu síðri en í Háskóla Íslands. Tölur prófnefndarinnar endurspegli aðallega gæði námskeiðsins sem í boði sé.

„Það er skoðun okkar að þetta námskeið sé fyrst og fremst framlenging á Háskóla Íslands og hafi verið það í gegnum tíðina. Við höfum ekki átt þess kost að fara yfir þessar upplýsingar en ef þær reynast réttar þá kallar það auðvitað á endurskoðun á námskeiðinu. Upplýsingar sýna að nemendur frá einni lagadeild virðast af einhverri ástæðu fá betri árangur út úr þessu og það verður ekki rakið til námsgetu,“ segir Þórður S. Gunnarsson.

gar@frettabladid.is