Jóhanna segir viðræðurnar gagnlegar

Jóhanna Sigurðardóttir forsætisráðherra segist hafa átt gagnlegar og efnismiklar viðræður við José Manuel Barroso, forseta framkvæmdastjórnar Evrópusambandsins, og Olli Rehn, núverandi stækkunarstjóra þess, í Brussel í morgun. Fundurinn átti að standa í 45 mínútur en lengdist í eina og hálfa klukkustund.

„Það fór mikill tími í að ræða Icesave og samskipti Íslands við Alþjóðagjaldeyrissjóðinn," sagði Jóhanna í samtali við fréttastofu að fundi loknum. Hún hafi gert Barroso grein fyrir því að það væri bæði óheppilegt og skaðlegt Íslandi þegar aðildarríki Evrópusambandsins tengdu lausn Icesave deilunnar við aðra endurskoðun AGS á efnahagsáætlun landsins. Jóhanna segist hafa farið ítarlega yfir stöðu mála á Íslandi og hún telji að aukins skilnings gæti á meðal Evrópuþjóða á málefnum Íslands.

Forsætisráðherra telur af og frá að leyndarhjúpur hafi verið yfir þessari ferð hennar til Brussel. Til hafi staðið að hún hitti Barroso á loftlagsráðstefnunni í Kaupmannahöfn en af því hafi því miður ekki geta orðið. Það hafi verið greint frá þessu opinberlega og að þessi fundur myndi eiga sér stað í febrúar. Þá sé hún ekki að forðast erlenda blaðamenn. „Ég var að koma úr viðtali við erlendan fjölmiðil," sagði Jóhanna.

Þá var aðildarumsókn Íslands að Evrópusambandinu rædd en hinn 24. febrúar kemur í ljós hvort framkvæmdastjórn ESB viðurkennir Ísland sem fullgilt umsóknarríki og verður umsóknin þá tekin formlega fyrir í marsmánuði. Forsætisráðherra sagðist vongóð um að umsókn Íslands verði samþykkt.

Jóhanna átti einnig fundi með yfirmönnum EFTA og ESA í Brussel. Nánar verður rætt við hana í kvöldfréttum Stöðvar 2.