Einkaferð Jóhönnu til Brussel

Þingmenn tókust á í upphafi þingfundar í dag um ferð Jóhönnu Sigurðardóttur, forsætisráðherra, til Brussel þar sem hún fundar með José Manuel Barroso, forseta framkvæmdastjórnar Evrópusambandsins. Fram kom í máli utanríkisráðherra að um einkaheimsókn væri að ræða. Þingmaður Framsóknarflokksins sagði forsætisráðherra hafa smánað þjóð sína.

Vigdís Hauksdóttir, þingmaður Framsóknarflokks, og Guðlaugur Þór Þórðarson, þingmaður Sjálfstæðisflokks, vildu vita hvert fundarefnið væri og þá gagnrýndi Vigdís að Jóhanna ætli ekki að ræða við fréttamenn að loknum fundi sínum með Barroso. Guðlaugur benti á að í stjórnarsáttamála ríkisstjórnarinnar væri talað um opinbera stjórnsýslu og í því ljósi spurði hann Össur Skarphéðinsson, utanríkisráðherra, út í þá leynd sem hvílt hafi yfir ferð Jóhönnu til Brussel.

„Eins og fram hefur komið þá er heimsókn forsætisráðherra skilgreind sem einkaheimsókn. Hún fer til þess að ræða við framkvæmdastjóra Evrópusambandsins um ýmis brýn mál sem varða samskipti sambandsins og Íslands," sagði Össur.

Guðlaugur sagði að ef málið hafi verið óljóst væri það nú með öllu óskiljanlegt. Hann benti á að aðstoðamaður Jóhönnu hafi sagt að um opinbera heimsókn væri að ræða.

Vígdís beindi fyrirspurn sinni til Steingríms J. Sigfússonar, fjármálaráðherra. „Komið hefur fram að forsætisráðherra hafi hafnað því að ræða við erlenda blaðamenn að fundi loknu í gær og er haft eftir blaðamönnum að slík framkoma sé einsdæmi og þeir sem hafni viðtali við blaðamenn eftir fundi með forseta framkvæmdastjórnarinnar eru að jafnaði einræðisherrar frá Mið-Asíu. Forsætisráðherra hefur því smánað þjóð sína með þessu hætti, það er að segja sé hún fulltrúi þjóðarinnar þarna úti á þessum fundum," sagði þingmaðurinn.

Steingrímur sagði að varla væri boðlegt að svara Vigdísi. Fundur Jóhönnu með Barroso hafi staðið til í langan tíma. Um hefðbundin fund væri að ræða sem tengist málefnum Íslands.

„Þó ég hafi oft haft uppi harða gagnrýni eða stór orð hér á þingi þá rekur mig nú ekki minni til þess að ég hafi líkt eða jafnað forsætisráðherrum Íslands við einræðisherra eða borið þá á þá að þeir væru að smána sína þjóð. Það skulu vera orð Vigdísar Hauksdóttur og hún skal eiga þau við sig," sagði Steingrímur.