Þingmenn skiluðu ekki upplýsingum

Nokkrir þingmenn, minnst fjórir úr Framsókn og einn úr Samfylkingu, ættu að vera en eru ekki á lista Ríkisendurskoðunar yfir þá sem skiluðu upplýsingum vegna prófkjörs 2006, fyrir alþingiskosningar 2007. Fjallað verður um aðra flokka síðar.

Ríkisendurskoðun mæltist til þess að frambjóðendur í prófkjörum 2005 til 2008 skiluðu upplýsingum um fjárframlög til sín fyrir síðustu áramót. Þingmönnum bar ekki lagaleg skylda til þessa.

Úr Framsókn vantar nöfn þeirra Birkis Jóns Jónssonar, Eyglóar Harðardóttur, Guðmundar Steingrímssonar (sem var þá í framboði fyrir Samfylkingu) og Höskuldar Þórhallssonar.

Birkir segist víst hafa skilað upplýsingunum: „Ég hef skilað öllu. Þetta var allt undir 300.000 króna viðmiðum og ég hef enga styrki þegið."

Eygló Harðardóttir taldi að hún þyrfti ekki að skila þessu, sérlega í ljósi þess að hún var búin að upplýsa fjölmiðla um kostnaðinn: „Þetta var á milli sjö og átta hundruð þúsund.

Fjölskyldan mín og ég greiddum stærstan hluta þess. Lítill hluti kom frá fyrirtækjum mér ótengdum, innan við 100.000 krónur," segir Eygló.

Guðmundur Steingrímsson segir að styrkir til hans hafi verið vel undir 300.000 krónum hver og hann hafi því talið að hann þyrfti ekki að skila yfirlýsingu: „Þetta voru bara vinir og fjölskylda sem styrktu mig um einhver smáskot," segir Guðmundur.

Höskuldur Þórhallsson taldi í gær að hann hefði skilað yfirlýsingu: „Ég fékk enga styrki, bara núll. En ég vil fara eftir tilmælum Ríkisendurskoðunar og mun senda henni þessar upplýsingar," segir Höskuldur.

Róbert Marshall er eini þingmaður Samfylkingar sem ætti að vera á listanum og er ekki. Þetta kemur honum á óvart: „Ég hef skilað öllu um þetta prófkjör. Ég fyllti út eyðublað og sendi inn. Ég eyddi sumsé 707.000 krónum. Hæsti styrkurinn var 250.000 frá Baugi og ég gerði grein fyrir honum," segir Róbert.

Lárus Ögmundsson hjá Ríkisendurskoðun segir að þeir sem ekki eru á listanum hafi ekki skilað upplýsingum, nema þær hafi misfarist í pósti: „Það er langt síðan við birtum þetta og þeir hafa ekki haft samband til að leiðrétta listann."