Sjálfstæðismenn vilja leita að olíu og gasi

Hópur þingmanna Sjálfstæðisflokksins vill að rannsakað verði hvort olíu eða gas sé að finna á landgrunninu norðaustur af landinu, eins og til dæmis á Tjörnes- beltinu. Þetta svæði er alveg uppundir landsteinum, en ekki í óra fjarlægð frá landi eins og Drekasvæðið, á milli Íslands og Jan Mayen, sem stjórnvöld hafa beint sjónum sínum að.

Ýmsar vísbendingar hafa komið fram í áranna rás um að gas og jafnvel olíu kunni að vera að finna á þessu svæði, sem sjálfstæðismennirnir vilja nú að gengið verði úr skugga um.

Þingmennirnir sem standa að tillögunni eru þau Kristján Þór Júlíusson, Ásbjörn Óttarsson, Einar K. Guðfinnsson, Jón Gunnarsson, Ragnheiður Ríkharðsdóttir og Tryggvi Þór Herbertsson.