Skuldbingar ríkissjóðs vegna ríkistryggðra skuldabréfa 29 milljarðar

Ríkissjóður hefur greitt um fimm milljarða króna frá hruni vegna ríkistryggðra skuldabréfa sem bankarnir tóku yfir við einkavæðingu. Heildarskuldbindingar vegna þessa nema tæpum tuttugu og níu milljörðum króna.

Þegar Búnaðarbankinn og Landsbankinn voru einkavæddir tóku þeir yfir skuldbindingar sem voru ríkistryggðar. Þetta eru að mestu leyti skuldabréf sem gefin voru út á markaði. Kaupendur þeirra, m.a. lífeyrissjóðir, höfðu keypt skuldabréfin með ríkisábyrgð og því var hún ekki afnumin við einkavæðinguna. Bankarnir greiddu af þessu þar til þeir féllu. Við hrunið féllu skuldbindingarnar svo á ríkissjóð sem hefur síðan þá greitt af þeim. Eftir því sem fréttastofa kemst næst hefur ríkissjóður þegar greitt um fimm milljarða króna frá hruni vegna þessa.

Samkvæmt heimildum fréttastofu nema þessar skuldbindingar um 28,8 milljörðum króna í heildina. Þær skiptast þannig að Kaupþing var með 1,8 milljarð, Glitnir um 400 milljónir og Landsbankinn með 26,6 milljarða króna.

Þrátt fyrir að ríkissjóður hafi nú verið að greiða af þessum skuldbindingum í hart nær tvö ár teljast þær ekki endanlega fallnar á ríkissjóð. Búið er að gera kröfur á gömlu bankanna og meðan ekki er búið að gera þá upp er óvíst hversu mikið fæst upp í kröfurnar.