Telja ný gjaldþrotalög engu breyta

Frumvarp til gjaldþrotalaga breytir litlu fyrir gjaldþrota heimili að mati lögmanna. Fjármálaráðherra segir að frumvarpið verða betrumbætt í meðförum þingsins.

Fyrningarfrestur krafna er mismunandi og fer það eftir eðli krafnanna. T.d fyrnast skaðabótakröfur vegna líkamstjóns á tíu árum, eða mun lengur en almennar fjárkröfur. Þau frumvarpsdrög sem nú liggja fyrir um breytingar á lögum um gjaldþrotaskipti miða að því að stytta fyrningarfrest á þeim kröfum sem ekki fást greiddar við gjaldþrotaskipti. Í frumvarpinu er lagt til að fyrningartími allra krafna sem lýst er í þrotabú verði sá sami, tvö ár, án tillits til þess um hvers konar kröfu er að ræða.

Samkvæmt lögunum getur kröfuhafi þrotamanns hins vegar höfðað viðurkenningarmál og rofið fyrningu kröfunnar ef hann getur sýnt fram á að hann hafi sérstaka hagsmuni af því að slíta aftur fyrningu og ef hann getur sýnt fram á að fullnusta geti fengist í kröfuna á nýjum fyrningarfresti. Ýmsir hafa gagnrýnt frumvarpið fyrir þetta ákvæði og segja að í núverandi mynd gangi frumvarpið ekki nægilega langt.

Sérfræðingar í gjaldþrotarétti, sem fréttastofa ræddi við í dag, segja að frumvarpið breyti ekki mjög miklu fyrir gjaldþrota einstaklinga því í raun geti kröfuhafi fært rök fyrir því að hann hafi alltaf sérstaka hagsmuni af því að slíta fyrningu ef krafan er ógreidd.

Fjármálaráðherra segir að skerpt verði á þessum hugtökum í frumvarpinu í meðförum þingsins, þannig að það verði skýrt hvenær heimilt verði að rjúfa fyrningu.

„Ég held að frumvarpið sé nokkuð góð lending, það þarf að sjálfsögðu að fara vel yfir skilgreiningar á því hvað þarf að liggja til grundvallar til að dómstólar fallist á að rjúfa fyrningarfrestinn. Þetta á að vera þröngur og vel skilgreindur farvegur. Það verður væntanlega gert í meðförum þingsins að fara vel yfir það og hafa lögskýringarnar eins skýrar og mögulegt er. Það er ekki meiningin að menn geti hreinsað hvað sem er af sér með gjaldþrotum, t.d skaðabætur eða skuldir vegna refsiverðrar háttsemi o.s.frv. Þarna verður að finnast málamiðlun milli þessara sjónarmiða," segir Steingrímur J. Sigfússon, fjármálaráðherra.