Kreditkortafærslur dregnar frá launum starfsmanna VR

Hundrað og sextíu þúsund krónur voru teknar út í tólf færslum á kreditkort í eigu VR sem ekki tilheyrðu félaginu árin 2007-2009 samkvæmt Deloitte endurskoðun. Formaður VR segir að skýringar hafi verið á öllum færslum og þær hafi verið dregnar frá launum starfsmanna.

Deloitte endurskoðun var falið að gera úttekt á meðferð kreditkorta hjá starfsmönnum VR tímabilið 2007-2009. Engar vísbendingar voru um misnotkun kortanna og var rekstrarkostnaður þeim tengdum talinn eðlilegur.

Þó voru tólf færslur upp á 160 þúsund sem töldust til einkaneyslu. Allt var það kostnaður tengdur ferðalögum erlendis sem síðar var endurgreiddur af starfsfólki. Í nokkrum tilvikum var um að ræða svokallaða fyrirfram greiðslu til starfsfólks í þeim tilvikum sem það greiddi með korti VR í stað eigin korts.

Kristinn Örn Jóhannesson formaður VR segir allar slíkar færslur hafa verið dregnar af launum starfsfólks.