Meintur árásarmaður slapp vegna galla á málsmeðferð

Héraðsdómur Reykjaness vísaði í gær frá dómi í máli gegn manni sem ákærður var fyrir brot á valdstjórninni með því að hafa slegið lögreglukonu með krepptum hnefa í húsasundi á Akureyri í júní síðastliðnum, en lögreglukonan tognaði á kjálka í árásinni.

Hinn ákærði neitaði að hafa slegið lögreglukonuna af ásetningi en útilokaði ekki að hann hefði óvænt veitt henni högg í andlitið þegar að hún var að reyna að stöðva hann. Hann sagðist ekki hafa getað verið með krepptan hnefann vegna þess að hann hafi verið með hendina í gifsi.

Dómari telur að við rannsókn málsins hefði átt að taka skýrslu af þeim lögreglumanni sem var með umræddri lögreglukonu á vettvangi. Þá hafi jafnframt verið ástæða til að fela öðru lögregluembætti að fara með lögreglurannsóknina svo fyllsta hlutleysis væri gætt við rannsókn málsins. Það hafi ekki verið gert. Því væri ástæða til að vísa málinu frá dómi.