Saksóknurum fjölgað í efnahagsbrotadeild

Ríkislögreglustjóri ætlar að ráða nýjan saksóknara í efnahagsbrotadeild sem mun starfa við hlið þess sem nú starfar, segir Guðmundur Guðjónsson, yfirlögregluþjónn hjá embættinu.

Dómsmála- og mannréttindaráðuneytið auglýsir á vef sínum í dag embætti saksóknara við efnahagsbrotadeild ríkislögreglustjóra. Gert er ráð fyrir að ráðherra muni skipa í embættið frá 1. júní næstkomandi. „Það er verið að fjölga í deildinni. Við vorum að auglýsa eftir fólki og erum að bæta inn fólki," segir Guðmundur Guðjónsson.

Guðmundur segir að hugmyndin sé sú að það verði sextán starfandi í deildinni, þar af sex lögfræðingar. Það sé verið að fjölga bæði lögreglumönnum og lögfræðingum. „Þannig að það er verið að styrkja bæði ákæruvaldsþáttinn og rannsóknarþáttinn," segir Guðmundur.

Helgi Magnús Gunnarsson er núna eini starfandi saksóknarinn í efnahagsbrotadeild. Hann hefur sótt um embætti héraðsdómara. Guðmundur Guðjónsson segir að gert sé ráð fyrir að tveir saksóknarar verði starfandi í framíðinni.