Eiður orðaður við Tottenham og West Ham

Franska dagblaðið L'Equipe fullyrðir í dag að ensku úrvalsdeildarfélögin Tottenham og West Ham hafi áhuga á að fá landsliðsmanninn Eið Smára Guðjohnsen í sínar raðir.

Eins og kunnugt er hefur Eiður Smári átt erfitt uppdráttar hjá Monaco í Frakklandi og var ekki í leikmannahópi liðsins í síðustu þremur umferðum frönsku úrvalsdeildarinnar á síðasta ári.

Hann er nú aftur byrjaður að æfa með Monaco en keppni í frönsku úrvalsdeildinni hefst aftur um miðjan mánuðinn.

Eiður hefur verið orðaður við fjölda félaga í Englandi, til að mynda Blackburn, en engar fregnir hafa borist enn af því hvort að um meira en meintan áhuga félaganna sé að ræða.