Reykjanesbær reynir að semja um risalán

Tveir starfsmenn þýsk-írska bankans Depfa, eru hér á landi til þess að semja við Reykjanesbæ um greiðslu á tæplega tveggja milljarða króna skuld bæjarins. Starfsmennirnir komu hingað til lands í síðustu viku.

„Við erum í viðræðum við þá varðandi lánið," segir Árni Sigfússon, bæjarstjóri Reykjanesbæjar, en hann segir að upphaflega hafi bankinn ekki viljað semja um skuldina sem nemur 1,8 milljarð. Sú afstaða hafi þó breyst og því hafi tveir starfsmenn bankans verið sendir hingað til lands.

Árni segir ekkert sérstakt að frétta af viðræðunum annað en að þær séu í gangi. Hann treysti sér ekki til þess að leggja mat á það hvort þær gangi vel eða ekki.

Reykjanesbær á undir högg að sækja vegna erfiðrar fjárhagsstöðu. Ekki bætti úr skák að fyrrgreinda lánið gjaldféll í ágúst. Bærinn er að fara í víðtækar niðurskurðaraðgerðir en hart hefur verið deilt um þær innan bæjarstjórnar. Engar tillögur þess eðlis hafa þó litið dagsins ljós.

Eftirlitsnefnd sveitarfélaga sendi Reykjanesbæ aðvörun en bæjarstjórn þarf að svara bréfinu fyrir 30. september. Sveitafélagið þarf að óska sjálft eftir aðstoð nefndarinnar lendi það í slíkum hrakningum að það geti ekki greitt af lánum sínum.

Fari viðræður á milli starfsmanna bankans og Reykjanesbæjar út um þúfur aukast líkurnar talsvert á að sveitafélagið þurfi að óska eftir aðstoð nefndarinnar.