Þótti millifærslur Hauks ólógískar

Báðir fyrrverandi bankastjórar Landsbankans báru vitni fyrir dóminum í gær. Halldór J. Kristjánsson gaf símaskýrslu frá Edmonton í Kanada og Sigurjón Þ. Árnason mætti á staðinn.

Sigurjón, sem ekki vissi af tilvist NBI Holdings, sagði frá því að í miðju bankahruni hefði hann hitt Hauk á gangi bankans. „Þá var hann rosalega glaður yfir því að hann hefði verið að bjarga peningum," sagði Sigurjón og vísaði til millifærslna af ýmsum aflandsreikningum, flestum inn á reikninga bankans sjálfs. „Hvernig í ósköpunum fórstu að því að millifæra þá? spurði ég. Ég hefði haldið að það væri hreinlega ekki hægt," sagði Sigurjón. Honum hefði þótt þetta „ólógískt", enda hefði hann ekki álitið innstæðurnar eignir Landsbankans.

Sigurjón greindi líka frá því að það væri ekki fordæmislaust að menn björguðu fé með því að leggja það inn á eigin reikning. Þannig hefði hann veitt forstjóra evrópska verðbréfafyrirtækisins Kepler Equities, dótturfélags Landsbankans, heimild til að leggja tugi milljarða tímabundið inn á eigin reikning haustið 2008 til að bjarga fyrirtækinu frá falli. Mikið hefði legið við, enda velta fyrirtækisins vel á annan tug þúsunda milljarða á ári.