Skötuselsfrumvarpið kornið sem fyllti mælinn

Vilhjálmur Egilsson, formaður Samtaka atvinnulífsins (SA) segir að samþykkt skötuselsfrumvarpsins á Alþingi í gær hafi verið kornið sem fyllti mælinn, því hafi samtökin sagt sig frá stöðugleikasáttmálanum. Ríkisstjórnin sendi sjálf frá sér yfirlýsingu í dag þar sem áréttað var að ekkert kæmi fram í sáttmálanum er varðar skötuselsfrumvarpið. Þá sagðist ríkisstjórnin ekki sammála því að stöðugleiksáttmálinn væri brostinn. Því hygðist hún vinna áfram í anda sáttámálans.

SA túlkar frumvarpið sem fyrsta skrefið í átt að fyrningaleiðinni þar sem frumvarpið kveður á um leigu kvótans til útgerða auk þess sem kvótinn er ekki framseljanlegur.

Í tilkynningu frá Samtökum atvinnulífsins segir að verulegur brestur hafi orðið af hálfu ríkisstjórnarinnar við efndir fyrirheita sáttmálans. Skattar hafi verið hækkaðir umfram það sem gert var ráð fyrir og ýmsar aðgerðir til að stuðla að aukinni atvinnu hafi ekki gengið eftir. Samþykkt frumvarpsins hafi síðan verið kornið sem fyllti mælinn.

Þá kom fram á blaðamannafundi að ef skötuselsfrumvarpið verður ekki dregið til baka þá mun SA ekki standa að stöðugleikasáttmálanum.