Dagsektir vegna hættu af brunahúsi

Borgarráð hefur samþykkt að gefa eiganda Baldursgötu 32 þrjátíu daga lokafrest til að fjarlægja húsið sem skemmdist í eldi á fyrri hluta árs 2008.

Fyrir brunann höfðu þáverandi eigendur hússins sóst eftir því að fá að rífa það og byggja nýtt hús. Eftir brunann var húsið sjálft síðan metið óhæft til endurbyggingar. Borgin hefur síðan tekið jákvætt í að veita nýjum eigendum byggingarleyfi fyrir nýju fjölbýlishúsi án þess þó að leyfið hafi verið gefið út því fullnægjandi uppdrætti skortir.

Í bréfi byggingarfulltrúa sem tekið var fyrir í borgarráði á fimmtudag kemur enn fremur fram að niðurrif hússins hafi verið samþykkt í desember 2008.

„Íbúar í nágrenni hússins hafa með réttu kvartað mjög yfir ástandi hússins og talið stafa frá því fokhættu auk annarra óþæginda,“ segir byggingarfulltrúinn. Í ljósi þess hversu uppbyggingaráform hafi dregist á langinn sé rétt að gefa húseigendunum nú þrjátíu daga frest til að fjarlægja húsið og undirstöður þess og tyrfa síðan lóðina. Ella verði eigendurnir sektaðir um tuttugu þúsund krónur á dag þar til verkið er unnið. - gar