Skar mann á háls með brotinni bjórkrús

Rúmlega tvítugur karlmaður hefur verið úrskurðaður í gæsluvarðhald til næstkomandi föstudags eftir að hann skar annan mann á háls með brotinni bjórkrús um helgina.

Atvikið átti sér stað í heimahúsi við Mánagötu í Norðurmýri í Reykjavík. Ekki er ljóst hver ástæða árásarinnar var, en mennirnir voru tveir í húsnæðinu og áfengi hafði verið haft um hönd.

Sá sem fyrir árásinni varð fékk svöðusár á hálsinn og var fluttur á Landspítalann þar sem gert var að sárum hans. Hann var ekki talinn í lífshættu og hefur nú verið útskrifaður af spítalanum. Árásarmaðurinn var handtekinn annars staðar í borginni.- jss