„Það er órói í samfélaginu“

„Það er órói í samfélaginu eins og við heyrum glöggt hér. Réttlát gremja og reiði er útbreidd vegna alls þess sem gerst hefur á Íslandi. Margir eiga um sárt að binda. Við skulum sína því skilning," sagði Steingrímur J. Sigfússon, fjármálaráðherra, í umræðum um stefnuræðu forsætisráðherra.

„Skilaboðin sem berast til okkar héðan utan af Austurvelli fara ekki á milli mála. Fjöldi fólks er ósáttur og sár. Fólki finnst alltof hægt ganga að greiða úr ýmsum vandamálum ekki síst skuldavanda heimilanna. Það er rétt að margt hefur reynst tafsamt og torsóttara en við var búist," sagði Steingrímur og bætti við: „Með fordæmisgefandi dómum um svokölluð gjaldeyris- eða myntkörfulán eru þó loksins þau mál að skýrast og þar stefnir í niðurstöðu sem mun laga umtalsvert stöðu tugþúsunda sem eiga í miklum vanda vegna gengislækkunar krónunnar. Höfuðstóll bíla- og húsnæðislána verður nú færður niður."