Sjálfstæðisflokkurinn skilar reikningum á næstu dögum

Sjálfstæðisflokkurinn mun skila ársreikningum fyrir árið 2007-2008 á allra næstu dögum samkvæmt framkvæmdarstjóra flokksins, Jónmundi Guðmarssyni.

„Að sjálfsögðu mun Sjálfstæðisflokkurinn skila þessum reikningum eins og öllum öðrum," segir Jónmundur en verkið er mikið og seingert. Að sögn Jónmunds eru 140 flokkseiningar innan Sjálfstæðisflokksins sem skila af sér reikningum fyrir árin 2007 og 2008. Því hefur tekið allnokkurn tíma að safna þeim saman.

Sjálfur stefnir Jónmundur á að upplýsingunum verði komið til Ríkisendurskoðunar innan örfárra daga.

Samkvæmt lögum um fjármál stjórnmálasamtaka og frambjóðenda og um upplýsingaskyldu þeirra, sem sett voru árið 2006, skulu stjórnmálasamtök árlega skila Ríkisendurskoðun reikningum sínum sem í kjölfarið skal birta útdrátt úr þeim.

Þar eiga að koma koma fram upplýsingar um heildartekjur og gjöld, uppruna tekna og helstu stærðir í efnahagsreikningi. Þá skal greina sérstaklega frá afsláttum sem samtök hafa fengið frá markaðsverði vöru eða þjónustu.

Enn fremur skal birta nöfn allra lögaðila sem veitt hafa framlög til starfseminnar.