Kærir líflátshótun á Facebook til lögreglunnar

Neminn og fyrrum sjónvarpsþulan, Ragnheiður Elín Clausen, var hótað lífláti í gærkvöldi á vefsíðu sem hún heldur úti á samskiptavefnum Facebook. Þar skrifaði hún svo seint í gærkvöldi:

„Það er virkilega maður hér að senda mér prívat skilaboð og hóta því að drepa mig...á ég að hlæja?"

Viðbrögð vina Ragnheiðar létu ekki á sér standa, þeir tóku skilaboðin alvarlega og hvöttu hana til þess að kæra málið til lögreglunnar. Samkvæmt áreiðanlegum heimildum Vísis þá hefur Ragnheiður tilkynnt hótunina til lögreglunnar sem hefur tekið málið til skoðunar, en líflátshótunin kemur frá nafngreindum einstaklingi en ekki gervisíðu.

Þetta er ekki í fyrsta sinn sem Ragnheiður lendir í vandræðum á Facebook, aðgangi hennar var lokað af Facebook-yfirvöldum á síðasta ári án þess að hún fengi tilhlýðilegar útskýringar á því. Það mál var hinsvegar farsællega leyst að lokum.

Þá vekur athygli að Fréttablaðið sagði frá því í júlí á síðasta ári að rithöfundinum Vigdísi Grímsdóttur hefði einnig verið hótað á samskiptavefnum. Vigdís vildi ekki gefa upp hverskyns hótanir hefði verið um að ræða. Það varð þó til þess að hún hætti að nota samskiptavefinn tímabundið.

Facebook hefur aldeilis slegið gegn hér á landi en um 60 þúsund Íslendingar nýta vefinn dag hvern. Flestir nýta hann þó í jákvæðari tilgangi.

Þegar haft var samband við Ragnheiði þá vildi hún ekki tjá sig efnislega um málið.