Verslað með notaðar skólabækur fyrir 32 milljónir

Framhalds- og háskólanemar hafa verslað með notaðar bækur að andvirði 32 milljóna króna í vetur í gegn um vefsíðuna Skiptibokamarkadur.is þar sem hægt er að selja bækur milliliða- og endurgjaldslaust.

Á fyrstu þrem vikum ársins 2010 hafa nemar verslað með um það bil 3 þúsund notaðar bækur að andvirði 12 milljóna króna. Frá því um miðjan ágúst og fram í lok desember voru bækur að andvirði 20 milljón króna seldar.

Valur Þráinsson, eigandi Skiptibokamarkadur.is, segir í tilkynningu að svo virðist sem að síðan hafi verið kærkomin tilbreyting fyrir framhalds- og háskólanema frá því að kaupa nýjar skólabækur eða selja bækurnar sínar á skiptibókamörkuðum með afföllum.

„Algengt er að bókakostnaður framhalds- og háskólanema sé á bilinu 30 til 60 þúsund krónur á önn að því gefnu að bækurnar séu keyptar nýjar. Því getur það munað töluverðum fjármunum á því að kaupa notaðar bækur auk þess sem seljendurnir fá eitthvað fyrir bækurnar sínar sem hefðu margar hverjar hefðu legið ónotaðar upp í bókahillu. Varla þarf að minnast á hversu umhverfisvæn þessi leið er til þess að gefa gömlu skólabókunum nýtt líf," segir Valur.