Hjörleifur fær rúmar sextán milljónir fyrir að hætta hjá Orkuveitunni

Hjörleifur Kvaran fær minnsta kosti sextán milljónir króna í starfslokakjör en samkvæmt útvarpsfréttum Ríkisútvarpsins í kvöld þá verður hann á launum næstu níu mánuðina.

Um er að ræða þrjá mánuði í uppsagnafrest og svo sex mánuðir í biðlaun. Stjórn Orkuveitunnar óskaði ekki eftir því að Hjörleifur ynni uppsagnafrestinn heldur var Dr. Helgi Þór Ingason, verkfræðingur, ráðinn sem forstjóri Orkuveitunnar.

Samkvæmt Tekjublaði Frjálsra verslunar var Hjörleifur með eina milljón og átta hundruð þúsund í mánaðarlaun. Því þarf borgin að greiða honum 16,2 milljónir áður en yfir lýkur.

Það fyrirkomulag er samkvæmt ráðningasamningi sem var gerður við hann árið 2008 þegar hann var ráðinn.

Nýr forstjóri Orkuveitunnar, Dr. Helgi Þór, er með talsvert lægri laun en Hjörleifur, eða 1,2 milljónir á mánuði, sem er sex hundruð þúsund krónum lægra en Hjörleifur hafði í laun.