Báðir í öndunarvél á Landspítalanum

Mennirnir sem misstu meðvitund um borð í Hoffelli á Fáskrúðsfirði í morgun eru báðir í öndunarvél á gjörgæsludeild Landspítalans.

Mennirnir voru fluttir með sjúkraflugi til Reykjavíkur um klukkan sjö í morgun og þaðan beint á gjörgæsludeild Landspítalans. Annar þeirra var með meðvitund þegar hann kom til Reykjavíkur en samkvæmt upplýsingum frá vakthafandi lækni eru þeir nú báðir í öndunarvél. Ekki fengust frekari upplýsingar um líðan mannanna.

Talið er líklegt að súrefnisskortur í lest skipsins hafi valdið því að mennirnir misstu meðvitund. Þegar magainnihald fiska byrjar að rotna eyðist súrefni. Þetta ferli er sérstaklega hratt þegar um minni fiska er að ræða líkt og með gulldeplu og loðnu en Hoffellið var að koma af gulldepluveiðum.