Ritstjóri DV hóar í fjárfestahóp

Reynir Traustason, ritstjóri DV, er að safna saman hópi fjárfesta til þess að kaupa DV, fréttavefinn DV.is og Mannlíf. „Ég er að safna saman fjárfestum og ætla þannig að hafa áhrif á það hverjir fá blaðið. Ég sjálfur er inni í því með verulega peninga," segir Reynir.

Hann segir að sér sé aðeins umhugað um að DV haldi sjálfstæði sínu. „Ég er ekki að tala um að verða stóreigandi heldur að vera með eins og ég hef reyndar verið í Birtingi," segir Reynir. Hann segist vera að vinna í málinu, en hann mæti einhverri samkeppni. Fréttavefurinn Eyjan fullyrðir að Jón Ásgeir Jóhannesson og bræðurnir í Bakkavör hafi einnig áhuga á því að eignast blaðið.

Reynir segir ekki tímabært að upplýsa um það hverjir verði með honum í hugsanlegum kaupum á blaðinu. „Það eru ágætis menn sem ég hef verið í sambandi," segir Reynir. Aðalmálið sé að þetta verði breiður hópur og ekki umdeildir menn.

Reynir segir ekki hægt að segja til um hvenær það skýrist hver kaupi blaðið. „Það gæti gerst á morgun, það gæti gerst hvenær sem er," segir Reynir.