Mátti litlu muna þegar leki kom að bát

Hjálmar Örn Guðmarsson hjá Slysavarnarfélagi Landsbjargar var einn af þeim sem komu að björgun Sómabáts sem leki kom að fyrr í dag. Hann segir að mikið vatn hafi verið komið um borð í bátinn þegar björgunarbátinn bar að garði en Sómabáturinn var staddur á sjónum út af Garðakirkju þegar óskað var eftir aðstoð.

Það var komið ansi mikið vatn í hann þegar við komum að honum," segir Hjálmar. „Vatnið var við það að fara upp fyrir lunninguna og við fórum strax um borð og hófum dælingu." Þá var taug sett í bátinn og hann dreginn tafarlaust til Hafnarfjarðarhafnar. Einn var um borð í bátnum og segir Hjálmar að honum hafi ekki orðið meint af volkinu.