Ekkert alltof spenntir fyrir hugmyndum AGS um skuldahámark

Sérfræðingar sem vinna nýju frumvarpi til sveitarstjórnarlaga vilja að sett verði þak á lántökur þannig að sveitarfélög geti ekki skuldsett sig umfram upphæð sem nemur 150 prósentum af árstekjum þeirra. Þetta er í samræmi við tilmæli AGS.

Ekkert hámark er í gildandi lögum um hversu mikið sveitarfélög geta skuldsett sig. Fréttablaðið greinir frá því í dag að vinna við frumvarp um breytingar á sveitarstjórnarlögum sé langt komin. Tvær nefndir á vegum ríkisins séu starfandi til að endurskoða sveitarstjórnarlögin. Á önnur nefndin að skila tillögum í formi frumvarps til samgönguráðherra í haust, en samkvæmt heimildum blaðsins verður þar lagt til þak á skuldsetningu sveitarfélaga. Vilja sérfræðingar að skuldir sveitarfélaga verði skilgreindar rúmt, þ.e undir þær falli bæði skuldir A-hluta og B-hluta sveitarfélaga, en undir B-hluta reksturs sveitarfélaga hafa fallið skuldir dótturfélaga þeirra, t.d falla skuldir Orkuveitunnar undir B-hluta Reykjavíkurborgar. Sá hluti reksturs sveitarfélaga sem fjármagnaður er með skattfé fellur undir A-hluta, eins og öll almenn þjónusta við íbúa o.fl.

Halldór Halldórsson, formaður Sambands íslenskra sveitarfélaga, segir að gera verði greinarmun á A-hluta og B-hluta í rekstri sveitarfélaga. „Það þarf að skoða það að í B-hluta hjá mörgum sveitarfélögum er þetta (hlutfall skulda innsk.blaðam) miklu hærra. Segjum að ef þetta verði sett í 150 prósent þá þarf nokkurra ára aðlögun að því," segir Halldór. Hann segir að þetta sé allt á skoðunarstigi ennþá.

Eins og fréttastofa hefur greint frá kemur fram í viljayfirlýsingu íslenskra stjórnvalda gagnvart AGS að þak verði sett á skuldsetningu sveitarfélaga sem nemur 150 prósentum af árstekjum þeirra. Þær lagabreytingar sem unnið er eftir núna eru því í samræmi við tilmæli AGS. En er þetta ekki löggjöf sem við þurftum fyrir tíu árum síðan? „Það er alveg rétt að það eru til ákveðin vandamál sem svona löggjöf hefði hugsanlega komið í veg fyrir," segir Halldór. Hann segir samt að ef fjárhagsstaða sveitarfélaga sé borin saman við stöðu ríkisins þá komi sveitarfélögin vel út úr þeim samanburði.