Rektorar áhyggjufullir yfir frekari niðurskurði

Rektorar lýsa yfir þungum áhyggjum sínum af áætlunum um enn frekari niðurskurð til háskólamenntunar í landinu og benda á að opinber framlög til háskólastigsins séu hlutfallslega miklu lægri hér en á hinum Norðurlöndunum. Í sameiginlegri yfirlýsingu frá þeim segjast þeir telja augljóst að stórlega skert fjárframlög geri að engu uppbyggingu síðustu ára og veiki háskólakerfið einmitt nú þegar brýnt sé að beita því til viðreisnar og endurbyggingar.

Í yfirlýsingunni benda rektorar á að háskólarnir gegni lykilhlutverki í uppbyggingu og framþróunar á öllum sviðum atvinnulífs og menningar. Með því að virkja þá miklu þekkingu og kunnáttu sem býr innan háskólanna megi skapa ný verðmæti, efla gagnrýna hugsun og auka víðsýni. Þetta sé ennþá augljósara nú þegar ríkir kreppuástand, og benda rektorar á hvernig brugðist var við í Finnlandi eftir kreppuna þar í byrjun síðasta áratugar.

Rektorar skora á íslensku þjóðina að nýta sér kraft háskólanna til endurreisnar samfélagsins, snúa vörn í sókn, og horfa á vandamálin sem tækifæri til frumlegra lausna. Þjóðin verði að horfa fram úr vandanum, virkja mannauðinn, hvetja til sköpunar, og sækja fram samhent og einbeitt til bjartari tíma.