Aðgangur að lánsfé hangir á Icesave

Það þarf að meta kostnaðinn sem hlýst af töfum á því að samið sé um Icesave. Hann getur verið mikill, segir Vilhjálmur Egilsson, framkvæmdastjóri Samtaka atvinnulífsins. Hvetur hann þá er að málinu koma til að nálgast verkefnið af ábyrgð og með alla hagsmuni í huga.

Vilhjálmur segir að lausn Ice-save-málsins hafi mikið að segja um aðgang að fjármagnsmörkuðum í útlöndum. Aðgangur ríkis-sjóðs og einstakra fyrirtækja að lánsfé sé nauðsynlegur, bæði vegna atvinnusköpunar en ekki síður vegna mikillar endurfjármögnunarþarfar ríkisins og orkufyrirtækjanna á næsta og þarnæsta ári.

„Það verður að vera búið að koma þessum málum í lag. Aðgangur að erlendu lánsfé er langur ferill og þetta þarf að vera í lagi þegar við þurfum á peningunum að halda. Þetta er ekki eins og að kveikja og slökkva ljós,“ segir Vilhjálmur.

Gylfi Zoëga, prófessor í hagfræði við Háskóla Íslands, sagði í Fréttablaðinu í síðustu viku að ef aðgangur ríkisins að erlendum lánsfjármörkuðum haldist lokaður þurfi að smíða nýja efnahagsáætlun. Í henni myndi líklega felast enn frekari lækkun þjóðar-útgjalda til að afla gjaldeyris. Það sé unnt að gera með lækkun gengis krónunnar, skattahækkunum eða niðurskurði ríkisútgjalda.

- bþs