Svindlarar herja á íslenska Facebook-notendur

Nígeríupóstarnir alræmdu eru farnir að láta á sér kræla á ný en Hilmar Sigvaldsson fékk bréf frá Benjamin T. Dabrah frá Ghana í gegnum Facebook reikninginn sinn.

Benjamin segist hafa undir höndum upplýsingar um háar fjárhæðir á reikningi manns sem ber sama föðurnafn og Hilmar. Sá maður á að hafa látist í jarðskjálfta í Kína og láti eftir sig mikið fé.

Svo fullyrðir Benjamín að ef Hilmar láti slag standa þá geti þeir hagnast talsvert á samvinnu sinni.

Benjamín biður Hilmar hinsvegar að nota ekki Facebook til þess að hafa samband við sig heldur gefur hann upp annað póstfang.

„Ef satt reynist á ég von á miklum auðæfum, en mér rennur í grun að þarna sé peningasvindlari á ferð," segir Hilmar léttur í bragði en hann vill koma á framfæri að svindlarar virðast vera farnir að nota Facebook til þess að komast í tengsl við hugsanlega fórnalömb.

Nígeríupóstar eru heimsfrægir en fólki er almennt ráðlagt að svara þeim ekki.