Ók niður lækni á reiðhjóli

Tæplega þrítugur karlmaður hefur verið dæmdur í tíu mánaða fangelsi og til greiðslu 333 þúsunda króna í skaðabætur fyrir að aka niður mann á reiðhjóli.

Hjólreiðamaðurinn, sem er læknir, var á leið til vinnu sinnar að morgni dags. Bifreið var þá ekið fram hjá honum og einhver kallaði til hans. Bifreiðin var stöðvuð á plani rétt hjá og ákvað hljóðreiðamaðurinn að hjóla þangað ef vera kynni að fólkið í bílnum ætti erindi við hann. Fyrir dómi sagði hann slíkt koma fyrir þar sem hann væri læknir. Svo reyndist ekki vera, enda þekktust mennirnir ekkert. Hins vegar fór ökumaður bílsins að spyrja hjólreiðamanninn hvort hann hefði ekki efni á bíl og hvernig honum þætti bíllinn sinn. Mennirnir áttu frekari orðaskipti, sem enduðu með því að læknirinn hjólaði í burtu. Bílnum var þá ekið á mikilli ferð á eftir honum með þeim afleiðingum að hann skall í götuna. Hann hlaut heilahristing, brot á úlnliðsbeinum og áverka og tognun á líkama.

Ökumaðurinn var undir áhrifum áfengis og fíkniefna, sem hann taldi ástæður athæfis síns, auk „mannaláta“. Hann var sviptur ökurétti í þrjú ár. - jss