Kanna svigrúm til niðurfærslu skulda

Efnahags- og skattanefnd mun óska upplýsinga frá bönkum um hvert svigrúm fyrir niðurfærslu skulda almennings sé. Hingað til hafa bankarnir neitað að veita þessar upplýsingar og borið við bankaleynd. Nú á að láta reyna á þetta til fulls.

Nefndin tók málið fyrir á fundi sínum í gær og ljóst er að þverpólitísk samstaða er um það. Sérfræðingur í fjármálaráðuneytinu og fulltrúi í Hagsmunasamtökum heimilanna voru kallaðir fyrir nefndina.

„Það er fáránlegt að Alþingi hafi ekki í höndum greinargóðar upplýsingar um svigrúm bankanna til afskrifta á skuldum heimila," segir Helgi Hjörvar, þingmaður Samfylkingarinnar og formaður nefndarinnar. Hann segir grundvallaratriði að þingið hafi þessar upplýsingar.

„Það er alveg ljóst að svigrúmið er umtalsvert en mikilvægt er að fyrir liggi hve mikið það er, hvernig því verði ráðstafað og ekki síst að svigrúmið verði örugglega allt notað í þágu heimilanna."

Ögmundur Jónasson situr í nefndinni fyrir hönd Vinstri grænna. Hann segir að þrýsta verði á banka og stofnanir um þessar upplýsingar. Allir beri ugg í brjósti vegna þess gríðarlega vanda sem steðji að heimilum og fyrirtækjum. „Þar má ekki gleyma því að eini aðilinn sem hefur verið varinn í þjóðfélaginu er lánveitandinn og það er fráleitt annað en að hann þurfi að axla einhvern hluta af hruninu."

Tryggvi Þór Herbertsson, einn fulltrúa Sjálfstæðisflokksins í nefndinni, segist vonast til að þetta verði heimilum til hagsbóta. Skort hafi á aðgerðir til að koma í veg fyrir að heimili fari í nauðasamninga. „Við leggjum upp með það núna að fara í almennar aðgerðir."

Birkir Jón Jónsson, varaformaður Framsóknarflokksins, situr í nefndinni. Hann segist fagna því sérstaklega að sátt sé að nást um að mæta skuldavanda heimilanna. „Það eru sérstök tíðindi að þingnefnd taki frumkvæðið. Við höfum beint þessu til ríkisstjórnarinnar, en samstarf þar hefur verið af skornum skammti."

Þór Saari, fulltrúi Hreyfingarinnar, segir vilja fyrir því í þinginu núna að taka á málinu með afgerandi hætti. Sjálfur vill hann sjá lækkun höfuðstóls miðað við vísitölu í janúar 2008.- kóp